🎯🇿🇦 🎯🇿🇦 🎯🇿🇦 🎯🇿🇦 🎯🇿🇦 🎯🇿🇦
In hierdie week se SportStroom het ons die voorreg gehad om saam te sit met ’n ware legende in Suid-Afrikaanse atletiek – Tertuis Liebenberg. Hy is wêreldwyd bekend vir sy kennis en ondervinding in spiesgooi en deel sy ongelooflike reis, die geskiedenis van die sport en sy mening oor die huidige talent in SA.
Waar alles begin het – ’n Liefde vir die Spies
Vir Tertius het alles op skool begin in Johannesburg. “My pa en my skoolafrigter, Avi van Rensburg, het daai liefde vir die sport by my geplant. My pa, Willem Liebenberg – beter bekend as Rostweer – en Avi het die vlam aangesteek.”
Hy onthou hoe hy as jong seun vir die groot ouens gestaan en kyk het. “Daar was een ou, Regard van den Berg, vandag ’n bekende akteur en regisseur. Ek was vreeslik beïndruk met hoe hy daai spies gegooi het.”
Hoe die Spies oor die jare verander het
Tertius verduidelik hoe die manne- en vrouespies verander is om veiligheid te verbeter. “In 1986 was daar besluit om die manne se spies aan te pas toe Uwe Hohn van Duitsland die wêreldrekord op 104.80m gesit het – die enigste mens ooit oor 100m.”Hulle het die swaartepunt verskuif en so die afstande verminder. Vir die vroue het hierdie verandering eers in 1999 gekom. “Selfs na al die veranderinge het Jan Zelezny amper weer 100m gehaal met 98.48m.”
SA se Spieshelde 🇿🇦
Tertius praat met groot trots oor ons plaaslike atlete soos Sunette Viljoen en Jo-Ané van Dyk.
“Sunette is een van SA se beste ooit. Haar beste gooi van 69.35m is nog steeds die 47ste beste gooi in wêreldgeskiedenis met die nuwe spies. En natuurlik was sy bitter naby aan ’n medalje by die 2012 Olimpiese Spele.”
2016 was ’n jaar om te onthou – “Jo-Ané wen silwer by die Wêreld Junior Kampioenskappe, Johan Grobler gooi oor 80m en kry silwer, en Sunette kry silwer by die Rio Spele.”Hy is vol lof vir Jo-Ané: “Sy’s lojaal, hardwerkend en alles wat jy wil hê in ’n topatleet. In 2023 het ons doelwitte gestel – en sy het elkeen oortref.”
Die Olimpiese Drukketel 🥇🥈🥉
Tertius gee ’n kykie agter die skerms by ’n Olimpiese finaal: “Jy staan alleen voor 80,000 mense. Dis net jy en die spies. Jy moet jou emosies beheer – dis ’n groot uitdaging.”Hy vertel van daardie oomblik toe Jo-Ané haar medalje verseker het: “Toe die laaste atleet val, kyk ons vir mekaar en glimlag. Daai oomblik – jare se harde werk – onbeskryflik.”
Die Toekoms van Spiesgooi in SA is Blink ☀️
Op die vraag oor die toekoms van die sport, sê hy sonder twyfel: “Die talent is hier. Waldo Smit het onlangs 82.64m gegooi, en Rocco van Rooyen is al oor 86m. Jong atlete soos Ewald Jansen gooi 78.10m op 18-jarige ouderdom – wêreldklas.”Hy noem ook Marné Grobler van die Kaap as ’n groot talent en sê dis belangrik dat rolmodelle soos Jo-Ané die jonges inspireer.
Mentors en Mense wat ’n Verskil Maak
Tertius het groot waardering vir die mentors en vriende wat sy pad gekruis het – van Jan Zelezny tot Kari Ihalainen en Dr Frank Dick, wat die voorwoord vir sy boek geskryf het.“Ek glo daaraan om mense erkenning te gee. Ek is wie ek is oor die mense wat my gehelp het – my pa, topafrigters en vriende. Hulle het almal ’n rol gespeel.”
’n Spesiale Storie uit Pakistan
Hy sluit af met ’n storie oor sy betrokkenheid by Arshad Nadeem van Pakistan. “In 2022 kom Arshad vir ’n maand SA toe om saam met ons te werk. Dit was ’n voorreg om deel van sy pad te wees – dis wat sport doen – dit bring mense bymekaar.”
Laaste Gedagtes 🎙️
Om met Tertius te gesels, was soos om deur ’n geskiedenis boek van spiesgooi te blaai – vol feite, stories en passie. Atletiek in SA is in goeie hande.Sy boodskap is eenvoudig: “Bly gefokus, bly toegewyd en respekteer dié wat voor jou gekom het.”
🎯🇿🇦 🎯🇿🇦 🎯🇿🇦 🎯🇿🇦 🎯🇿🇦 🎯🇿🇦
#Spiesgooi #SportStroom #PotchGazette #TheGoToGuy #StroomStories #Potchefstroom
.jpeg)
