Die eerste week van skool reeds verby vir Tokkies se nuutste woelwaters

Die eerste week van skool is al verby vir die graad een leerders by Laerskool Mooirivier, maar hulle sal hul eerste dag in die ‘grootskool’ beslis onthou. Die eerste dag van skool is gewoonlik sinoniem met ‘n paar trane - van beide mamma én kindjie. Maar ondanks die trane, is die oorheersende gevoel steeds een van opwinding vir die nuwe skooljaar.

Foto (Verskaf): Groot glimlagte

Die Tokkie-gees het hoog geloop in die klaskamer én op die speelgrond die afgelope week. Maats wat na mekaar verlang het gedurende die lang Desembervakansie, stories wat gedeel word en die opwinding om te sien wie jou Juffrou of Meneer is hierdie jaar. Vir die graad sewe leerders is dit ‘n bittersoet gevoel - dit is die laaste jaar in die laerskool, maar hul weet terselfdetyd dat hulle op die kruin van iets groter staan. Die nuwe graad vier maats begin hierdie jaar met eksamen en klasse wissel. Baie verandering, baie nuwe dinge, maar báie opwinding.

Foto (Verskaf): Dié drie maatjies sien baie uit na hierdie jaar

Kwartaal een beteken ook dat die atletiek-seisoen in volle swang en met alle erns afskop. Daar word alreeds nalope, hekkies, kortafstande en ander baanitems geoefen in die oploop na Interhuis en eindelik Interlaer. Ons weet sommer dat die atlete Laerskool Mooirivier se naam hoog gaan hou tydens die byeenkomste en ons hou ons oë oop vir die prestasies. 

Foto (Verskaf): Hierdie vier knapies is reg vir die skooljaar

Met die lui van week twee se skoolklok wens ons elke Tokkie onderwyser, leerder en personeellid alle sterkte toe vir 2026. Mag hierdie ‘n jaar wees wat vrug dra vir julle skool in alle opsigte. 

____________________________

Johané van Dyk - Potchefstroom

Foto's

Alle foto's verskaf deur Laerskool Mooirivier