Krieketkoors en Kameraderie: La Hoff se Pappa Liga 2025 Slaan ’n Ses!
- Yolandi Botes
- 1 day ago
- 2 min read
Geen wind, dreigende reën of stywe spiere kon die geesdrif demp tydens Laerskool La Hoff se jaarlikse La Hoff Pappa Liga (LPL) nie. Dié gewilde instelling op die skoolkalender het op 15 en 22 November 2025 plaasgevind en weer eens bewys dat wanneer La Hoff se pappas (en onderwysers!) die kolf opneem, dit ’n fees van vriendskap en pret is.
Vir twee dae het die skoolgronde gewemel van ondersteuners, spantruie en strategieë wat gewissel het van "slaan hom hard" tot "probeer nie seerkry nie".
Weerstand teen die Elemente
Hoewel die weer nie altyd saamgespeel het nie, was die spelers se gees onbreekbaar. Die kompetisie was straf, maar die lag was harder as die donderslae. Elke graadgroep het hul staal gewys in 'n poging om die gesogte titel as "Baas van die Baanslag" te verower.
Merkor Thunder Maak Geskiedenis
Vir die derde agtereenvolgende jaar is dit die span van Graad 5, Merkor Thunder, wat as kampioene gekroon is. Met ’n indrukwekkende vertoning van spanwerk en kragkrieket het hulle gewys hoekom hulle tans onoorwinbaar lyk.
Die "Champion Traders Onderwysers" het egter nie sonder 'n geveg besgegee nie en het 'n welverdiende tweede plek ingepalm, gevolg deur die Graad 4 "Vision Sports Knight Riders" in die derde plek.
Aan die ander kant van die spektrum het die Graad 3 "Maintaintech Hurricanes" die gevreesde (maar geliefde) Houtlepel (Wooden Spoon) huis toe geneem, ’n bewys dat deelname soms belangriker is as wen!
Individuele Uitblinkers
Alhoewel krieket 'n spansport is, was daar individue wat die skare op hul voete gehad het:
MVP van die toernooi: Xander Cornelius, wat met kolf en bal uitgeblink het.
Beste Kolwer: Stephen Lang, wat die grensdraad gereeld laat sing het.
Beste Bouler: Essie Jv Rensburg, wat paaltjies laat spat het.
Meer as Net 'n Spel
Die organiseerders het die sukses van die dag opgesom met die woorde: "Die LPL is nie net krieket nie, dis gemeenskap, lag en herinneringe wat lank sal hou." ’n Spesiale woord van dank is gerig aan die hoofborg, Vision Sport, vir hul lojale ondersteuning wat hierdie dag van spanbou moontlik maak, asook aan elke ander borg wat bygedra het tot die sukses.
Terwyl die stof gaan lê en die spierpyn intree, sien die La Hoff-gemeenskap reeds uit na LPL 2026. Gr 5 Merkor Thunder sal egter dalk harder moet oefen, want daar is agt ander spanne wat nou reeds planne beraam om daardie trofee af te neem!
LPL 2025: DIE UITSLAE IN 'N NEUTEDOP
Top 3:
🥇 1ste: Gr 5 Merkor Thunder
🥈 2de: Champion Traders Onderwysers
🥉 3de: Gr 4 Vision Sports Knight Riders
Die Res van die Pak: 4. Gr 1 42 Upon Williams Sixers 5. Gr RR C-Thru Stars 6. Gr 2 Rapid Sunrisers 7. Gr 7 BED Strikers 8. Gr R Innovex Kings 9. Gr 6 Magniforce Super Kings🥄 Wooden Spoon: Gr 3 Maintaintech Hurricanes
Comments