Kry jou by Pad.langs

The Go-To Guy het besoek af gaan lê by die nuutste koffiewinkel in Potchefstroom - Pad.langs.

Johan en Liezel saam met die dinamiese Padlangs span

Gebore uit 'n passie

Padlangs is ‘n konsep. Op hierdie stadium is dit net ‘n koffiewinkel, met die oog op uitbreiding om dit in veel meer te verander. Gebore uit die passie wat hy en sy vrou, Liezel, vir fietsry en ‘n gesonde leefstyl het, het Pad.langs ontstaan. “Dit gaan oor die gemeenskap”, het Johan genoem. Geleë op die Modderdampad of soos baie inwoners daarna verwys, die ‘oefenpad’, is die idee om dié koffiewinkel as wegspring te gebruik en ‘n verversing na die tyd daar te geniet.

Meer as genoeg sitplek

Hulle bring meer as net lekker koffie na die tafel

Lekker kos, vars produkte en gehalte kwaliteit koffie is die mantra van die Pad.langs span. Funksionele fiksheid is die oorhoofse fokus en dit sal ook wees hoe die speelarea ontwerp en gebou word. Op die stadium is daar ‘n 1.6km fietsbaan wat ook dien as staproete op die perseel vir oud en jonk. Die jongspan kan ook op die twee kleiner bane tekere gaan terwyl mamma en/of pappa die real McCoy aandurf.  

Die twee bane waar die kinders kan speel

"Ons wou ‘n gemeenskap skep rondom beweging, gesondheid en die goeie dinge in die lewe - goeie kos, goeie koffie en goeie mense”, het Johan gesê.

Koffiewinkels, CrossFit en Kerk

Potchefstroom bestaan omtrent uit koffiewinkels, kerke en CrossFit, so om jou koffie te laat uitstaan, moet dit besonders wees. Die Weideman egpaar het lank en ver gesoek na ‘hulle’ koffieboon, “dit was omtrent die 50ste boon waarop ek en Liezel [eindelik] besluit het”. Hul kosse word ook met net die beste bestandele gemaak, soos hul roosterbroodjies wat met suurdeegbrood gemaak word. Johan vertel verder met trots dat die showstopper die Bosburger is - en die Go-To Guy span kan dié stelling beaam. Hierdie sappige burger bestaan uit ‘n gemsbok patty en die garnering verskaf deur die groente wat die tonnels op die perseel oplewer.

Die bekende Bosburger

Môrestond het goud in die mond

Beide Johan en Liezel se grootwordjare was baie aktief en hul het hierdie leefstyl voortgesit in hul eie gesinslewe. Hulle is een van daardie gesinne wat op ‘n Saterdagoggend reeds douvoordag op en wakker is om te gaan fietsry of ‘n draffie te vang. Deesdae is hul steeds vroeg wakker, maar eerder om die koffiewinkel te kom oopsluit, aangesien die deure al vanaf 06h30 oop is. Pad.langs bied ook die gerief deur hul ‘Huiskos’ as wegneemete vooraf te bestel, maar die groot fokus is om die gemeenskap om ‘n tafel te kry, eerder as ‘n ‘kry-en-ry’ opsie.

Heerlike koek, pretzels, neute en konfyte te koop

Lekker koekies en suurdeegbrood

Johan kuier op StroomStories

Tydens ‘n episode van StroomStories, het Pieter Conradie met mede-eienaar en stigter, Johan Weideman, gesels oor Pad.langs en hoe hierdie droom in ‘n realiteit verander het. Kliek hier om na die volle episode te kyk. Lees ook die onderstaande artikel oor wat om in die toekoms te verwag:

StroomStories: Johan Weideman Shares the Journey of Padlangs Coffee Shop

Pieer en Johan tydens 'n episode van StroomStories

Hulle tik al die boksies

Natuurlik moes ek self verder gaan ondersoek instel om hierdie nuwe koffiewinkel van my lysie af te tik. Die rustigheid en oop ruimtes is die eerste ding wat 'n mens opval. Ek kan die salted caramel latté en flat white beslis aanbeveel en hulle hoender mayonnaise roosterbrood is fenominaal! Dié is ‘n koffiewinkel wat my gereeld gaan sien.

Hoender en mayonnaise roosterbroodjie

Doen jouself en jou tastebuds ‘n guns en besoek Pad.langs Koffiewinkel. Die personeel en eienaars staan gereed om jou met breë glimlagte, fantastiese diens en heerlike kos en drinkgoed te ontvang. 

___________________________

Johané van Dyk - Potchefstroom