LiggieFees 2025 - ‘n Ware skouspel van ligte

Johané
Dec 9, 2025
2 min read

Nes elke Desember is daar groot opwinding, nie net omdat dit die Kersseisoen is nie, maar omdat dit weer tyd is vir Abraham Kriel Kinderhuis se LiggieFees. Hordes mense besoek elke aand die gronde vanaf 28 November - 31 Desember om die skouspel van liggies te beleef.

'n Spesiale jaar

Vanjaar se LiggieFees is besonder spesiaal - dit is die fees se tiende bestaansjaar. Wat begin het met ‘n paar duisend liggies, groot drome en ‘n groter verwagting, het ontplof in miljoene liggies, drome wat waar word en verwagtinge wat jaar na jaar oortref word. Die voorbereiding vir die fees begin al vroeg-vroeg en in April word die liggies stelselmatig opgehang. Dit is te verstane, aangesien dit ‘n allemintige taak is!

Die weer hou nie besoekers weg nie

Ondanks die temperamentele weer in Potchefstroom, is daar elke aand voete op die perseel. Van jonk na oud loop in verwondering en staar na die motiewe, liggies wat met musiek gesinchroniseer is sorg vir wonderlike video’s en om elke hoek en draai is daar ‘n foto-geleentheid. Besoekers kan uitsien na ‘n paar nuwe motiewe, Kersvader se Werkswinkel en die pragtigste feëtjietuin.

Kom honger!

Die reuke wat die lug vul is genoeg om jou mond behoorlik te laat water en die maag te laat grom. Die tradisionele kerrie en rys, pannekoek en rib rolle is op hul gewone staanplek. Vanjaar is Pesto’s ook daar met die heerlikste koek - beslis ‘n stalletjie wat elke soettand moet besoek. Koffie, koeldrank en ander drinkgoed is ook natuurlik beskikbaar en daar is selfs ‘n snoepie (nie nét vir die jongspan nie).

Groot name vir 'n groot jaar

Omrede vanjaar ‘n gróót viering is, het Abraham Kriel Kinderhuis gróót name gekry om hierdie spesiale bestaansjaar te vier. Steve Hofmeyr, Juanita du Plessis, Appel en Riaan Benadé is slegs ‘n paar kunstenaars wat die verhoog betree. Besoekers kan nog uitsien na Bobby van Jaarsveld, Kurt Darren, Jo Black en Bernice West - om slegs ‘n paar te noem.

Foto (Voelgoed Media webtuiste): LiggieFees 2025 Program

Dit is nou eers die helfte van die maand, maar ons weet LiggieFees 2025 gaan ‘n reuse sukses wees! Baie dankie dat julle altyd julle harte en deure vir die gemeenskap oopmaak, Abraham Kriel Kinderhuis. Dit is ‘n voorreg om ‘n bydrae te lewer in die lewens van jul kinders. Dankie aan die personeel wat hierdie enorme taak jaar na jaar aanpak om dit elke keer ‘n sukses te maak. Dit is beslis ‘n hoogtepunt op almal se kalenders.

Ons sien alreeds uit na LiggieFees 2026!