Nóg 'n student doodgeskok by Potchefstroom Treinstasie

Stel jou voor. Jy is ‘n eerstejaarstudent, jy het ‘n pragtige metgesel aan jou sy en die vooruitsig van ‘n heerlike aand saam met jou vriende. Voor die tyd moet daar foto’s geneem word, natuurlik. Julle groep besluit om na die treinstasie te gaan, want julle het gesien hoe mooi kom foto’s hier uit…en daar het al báie studente daar foto’s laat neem. Julle wil ‘n groepfoto kry op een van die waens, maar een van die groepslede raak aan ‘n oorhoofse, lewendige kabel en sak inmekaar. In ‘n oogwink is ‘n lewe verby. 

Foto (Facebook/HTS Middelburg Oud Skoliere): Wiëm Pretorius

Alles verander in 'n oogwink

Die bogenoemde scenario klink dalk heel onskuldig en ietwat bisar, maar dit is presies wat met nóg ‘n student aan die Noordwes-Universiteit se Potchefstroomkampus gebeur het. Wiëm Pretorius (19) is op Woensdag, 24 September 2025, oorlede nadat hy probeer het om op ‘n treinwa te klim en in aanraking gekom het met ‘n lewendige kragkabel. DA-raadslid, Madra de Bruin, het genoem dat dit die vierde persoon is wat op die stasie sterf in haar 15 jaar as raadslid in Potchefstroom. Wiëm, ‘n oud-leerder van HTS Middelburg, het in 2024 matrikuleer en het ‘n blink toekoms voor hom gehad. Een sosiale media verbruiker se kommentaar lui: “Daar is niks so onseker soos die dood nie, maar ook niks so onseker soos wanneer dit jou padlangs gaan kom nie.”

Foto (The Go-To Guy webblad): Potchefstroom Treinstasie

Remembering Arno Hollander

Op 26 Oktober 2019 het dieselfde lot Arno Hollander, ‘n finalejaar aptekerswesestudent en inwoner van Laureus Manskoshuis, oorgekom. Arno en sy vriende het ook foto’s gaan neem by die treinstasie voordat hulle na 'n dinee sou vertrek, toe hy glo op ‘n wa geklim het en aan ‘n oorhoofse, blootgestelde kragkabel geraak het - hy is op die toneel dood. Sy Facebook profiel is verander na Remembering Arno Hollander en dit is hier waar sy vriende en familie die beste herinneringe van en saam met hom deel, want net dalk bring dit ‘n oomblik se troos en ‘n fyn glimlag om iemand se mond. 

Foto (Facebook): Arno Hollander

'n Geweld 'hotspot'

Potchefstroom treinstasie ís nie meer wat dit was nie en het, sedert dit in puin gedompel is, ‘n ‘hotspot’ vir geweld geword. Dié eens geliefde treinstasie, wat ouer as ‘n eeu was, is vyf jaar gelede (September 2020) deur ‘n brand vernietig. Die oorsaak van die brand kon nooit bevestig word nie en intussen is die lêer gesluit, volgens Kolonel Adéle Myburgh, polisiewoordvoerder. Ondanks die waarskuwings, is daar steeds mense wat hul nie daaraan steur nie. Raadslid de Bruin het genoem dat sy al talle pogings aangewend het om die spoorlyn te laat sluit, “maar is meegedeel dat daar geen befondsing daarvoor is nie”. 

Foto (The Go-To Guy webblad): Die verwoestende brand in September 2020

Hoeveel lewens moet nóg verlore gaan voordat inwoners (en veral studente) eindelik wegbly van die uitgebrande spoorwegstasie? Dit vra ook die vraag, hoeveel lewens moet nog verlore gaan voordat die munisipaliteit besluit om iets aan hierdie gevaarsone te doen? In die tussentyd word elke Potchefstromer, student en besoeker vermaan om weg te bly van dié stasie. 

Ons innige meegevoel en simpatie aan die ouers en geliefdes van Wiëm in hierdie moeilike tyd.

______________________________________

Johané van Dyk - Potchefstroom