Potch Dam in die kollig: Wanbestuur en verlore potensiaal, maar tog ’n bietjie hoop

Dit is geen geheim dat Potch Dam ‘n reputasie het onder Potchefstromers, maar ‘n onlangse berig op Netwerk24 het weer die kollig op dié eens geliefde ontspanningsoord geplaas. 

Byna twee jaar later

In Februarie 2024 het die Potch Gazette gaan besoek aflê om te sien wat nou eintlik daar aangaan en dit was toe reeds nie in die beste toestand nie. Maar ‘n onlangse artikel op Netwerk24 het bevestig wat inwoners (en heel moontlik, bestuur) lank reeds sien kom het - toestande het eenvoudig vererger. Soveel so dat Susan Cilliers (Netwerk24 Joernalis) in haar artikel noem dat sommige badkamers se geisers gesteel is. Hoe het dit in byna twee jaar so vervalle geraak en hoekom doen die munisipaliteit niks hieraan nie? 

'n Hartseer realiteit

Alles kom neer op die wanbestuur van fondse en die tekort aan instandhouding. Vergaderings word gehou waar daar meer as een keer klem geplaas word op die belangrikheid van bevoegde bestuur (en personeel), veiligheid en instandhouding - maar duidelik val dit op dowe ore. Dit is hartseer om te dink dat dié eens ‘n plek was waarheen families en gesinne naweek na naweek gestroom het om tyd langs die water deur te bring en werklik daarna uitgesien het om dam toe te gaan. 

Potchefstroom Dam in die kollig - vir al die verkeerde redes

Ondanks DA-leier, John Steenhuisen, se besoek aan Potchefstroom op 4 September, het ons dam dit reggekry om vyf dae daarna wéér opslae te maak. Die videomateriaal van Steenhuisen se besoek laat die kyker in skok en sonder woorde. Die badkamer wat afgeneem word is iets uit ‘n gruwelfilm en soos John noem in die video, “dit lyk soos ‘n spookdorp”. Maar waar presies hierdie ablusieblokke en vervalle geboue is wat hulle in die video en op foto’s wys, het ék nie een keer gekry terwyl ek daar was nie, want by die Dagbesoekers area is dit heel... aanvaarbaar vir ‘n publieke spasie. 

Foto: 'n Skermgreep uit die video tydens John Steenhuisen se besoek aan Potchefstroom Dam

Februarie 2024 vs September 2025

Om appels met appels te vergelyk, het die Potch Gazette weer besoek gaan aflê by Potchefstroom Dam en byna dieselfde 'roete' gevolg as die vorige keer. Om mee te begin, die ingangsfooi is nie meer R133 nie, maar R150. So, hoe lyk dit ná ‘n jaar en sewe maande? Eerlikwaar, beter as wat ek verwag het. Dit is nou nie asemrowend nie en alhoewel dit hartseer is om te sê, is dit in ‘n toestand waaraan ons gewoond geraak het - tipies dít wat jy verwag van ‘n publieke area. Alhoewel die vroue se een badkamer gesluit was weens ‘n toilet wat oorspoel het, was die res van die ablusies in ‘n ‘orraait’ toestand.

'n Aangename verrassing

Die speel area se klimrame het ‘n nuwe laag verf gekry en lyk stukke beter as voorheen. Die gras is steeds plek-plek te lank, maar langs die (vol) dam self, word dit goed instand gehou. Ek was ook verbaas oor die hoeveelheid besoekers aan die dam. Sommiges het gestaan en visvang, ander het hul gate uit geniet in en op die water en daar was selfs ‘n drawwer wat die meeste van die rustigheid en heerlike sonskyndag gemaak het. Na dít wat in die media verskyn het, het ek verwag dat daar niemand sal wees nie. Nietemin, ek was aangenaam verras. 

'n Oogseer of twee...of drie

Natuurlik is daar oogsere soos die kurio winkel wat letterlik net ys verkoop; die rakke is leeg en daar is slegs ys plakkate buite teen die ruit. Die restaurant bordjie wat al wind en weer weerstaan het laat besoekers met ‘n valse hoop dat hul iets te ete gaan kry en die plesierboot se kantoor is steeds toe en so effe bebos. 

Dan wil ek nie eens praat van sommige geboue op die perseel nie. Die rondawels by die ingang van die dam het beslis beter dae gesien en sommige oornag fasiliteite het nie eens gordyne of blinders nie. Daar is ook 'n paar geboue wat lyk of mense permanent daar woon...maar dít vir 'n ander dag.

Nadat ons gesien het wat ons wou sien, besluit ons om dit 'n dag te noem. Met die uit ry word ons onkant betrap deur klippe wat die uitgang versper. Ek het probeer sien of daar dalk onderhoud gedoen word aan die 'Exit' hek, maar kon niks sien nie en in behoorlike Afrika-styl, het die personeel 'n 'plan' gemaak.

Daar lê soveel potensiaal in Potchefstroom Dam en hopelik sal die afgelope ruk se publisiteit die JB Marks Munisipaliteit onder druk sit om daadwerklik werk hiervan te maak en dié ontspanningsoord weer te herstel en rehabiliteer na die trekpleister wat dit eens was. 

_____________________________________

Johané van Dyk - Potchefstroom

Foto's van Potchefstroom Dam en fasiliteite soos op 14 September 2025