Potch Geesfees 2025: Alles wat jy moet weet voor jy jou stalletjie opslaan

As daar een ding is wat Potchefstroom elke jaar regkry, is dit om ‘n fees te gooi wat die dorp behoorlik laat lewe. Die Potch Geesfees is terug van Vrydag 29 Augustus tot Saterdag 30 Augustus 2025, en as jy een van daai mense is wat graag jou lekker kos, handgemaakte goed of funky klere wil uitstal, dan moet jy hierdie stukkie mooi lees. Hier’s die lowdown, in regte Potch-styl.

Hoe om in te skryf

Die aansoekproses is redelik reguit, maar moenie lui wees nie. Jy moet die vorm mooi lees, elke bladsy teken, ‘n kopie vir jouself hou, en as jy twee spasie soek, moet jy twee vorms invul. Geen foto’s van jou stalletjie? Dan’s daar ook geen kans dat jy gekeur word nie. Aansoeke sluit in twee fases:

• 1ste fase tot 30 Junie 2025, met uitslae teen 7 Julie

• 2de fase ná 30 Junie, met uitslae ná 7 Julie

• Finale sluitingsdatum: 28 Julie 2025

𝑽𝒐𝒍𝒈 𝒅𝒊𝒆 𝒔𝒌𝒂𝒌𝒆𝒍 𝒐𝒎 𝒋𝒐𝒖 𝒂𝒂𝒏𝒔𝒐𝒆𝒌𝒗𝒐𝒓𝒎𝒔 𝒂𝒇 𝒕𝒆 𝒍𝒂𝒂𝒊: https://bit.ly/4k80gcw 📬 of stuur vir Jessica en Joey 'n epos na geesfeespotch@gmail.com met jou navraag.

Die aansoekvorms kan ook via ons webblad afgelaai word: www.geesfeespotch.co.za

Jy’s nie net 'n nommer nie, maar ook nie ‘n sekerheid nie

Selfs al was jy laasjaar daar, beteken dit nie jy is weer in nie. Alle aansoeke word gekeur en die komitee se besluit is finaal. As jy teen 11 Julie niks hoor nie, stuur ‘n e-pos, maar moenie probeer bel nie.

Wat jy mag verkoop (en wat nie)

Kry jou hoofproduk reg, want jy mag dit nie later verander nie. En moenie skelm produkte bysit wat jy nie vooraf opgegee het nie, dis nie ‘n vlooimark nie. Rasistiese of seksistiese goed? Vergeet daarvan. Gehalte tel, drama nie.

Kosstalletjies? Dis nie net chips en wors nie

As jy kos wil verkoop, moet jy 'n tydelike gesondheids-sertifikaat hê van jou plaaslike munisipaliteit (Potch val onder JB Marks, net so terloops). Jy’t ook ‘n 9 kg brandblusser nodig. Die ou met die roosterbrood gaan nie jou hele stalletjie afbrand nie, dis net vir ingeval.

Jou stalletjie, jou spasie (bly binne jou lyne)

Jy kry die presiese grootte wat jy aansoek voor gedoen het. Geen uitbreiding, geen afsnyding, geen “net gou skuif” nie. As jy vergeet het van jou baniere en borde, jammer vir jou. En moenie buite jou ruimte begin adverteer nie.

Handelsure en reels vir voertuie

Jy moet vir die volle tyd daar wees:

• Vrydag 29 Augustus van 14:00 tot 21:00

• Saterdag 30 Augustus van 09:00 tot 21:00

Tussen hierdie tye mag geen voertuig op die terrein wees nie. As jy probeer smokkel, sal jy vrae moet beantwoord... buite die feesgronde.

Betaal betyds, of moenie kla nie

Daar’s nie plek vir laatbetalers nie.

• 50% is betaalbaar teen 11 Julie (as jy in Fase 1 is)

• Finale betaling moet teen 31 Julie in wees

• EFT of bankdeposito – hou jou kontant by jou

• Gebruik “Geesfees + besigheid se naam” as verwysing

Kanselleer? Dis nie vir free nie

As jy binne 30 dae kanselleer, verloor jy 50% van jou geld. Binne 14 dae? Dan kry jy niks terug nie. En jy moet dit skriftelik doen, anders gebeur daar niks.

Permitte, parkering en die boring goed

• Elke gewone stalletjie kry 2 armbandjies, kosstalletjies 4

• Jy kan ekstra koop teen R100 elk, maksimum 2 of 4 ekstra afhangende van jou tipe stalletjie

• Moet asb. nie oornag in jou stalletjie nie.

• Verblyf beskikbaar by On Site Gastehuis en Kwena Lodge

Bring saam

• Tafels, stoele, multi-plugs, grondbedekking, gieter (vir die stof – Potch is droog)

• Alles wat jy nodig het om ‘n stalletjie te bedryf, jy kry nie freebies nie

• Bewys van adres, ID, foto’s van jou stalletjie, gesondheidsertifikate (vir kos ouens)

Moenie wag tot die laaste minuut nie. Kry jou admin reg, bring jou gees saam en onthou, dis ‘n fees, nie ‘n drama nie. Dis Potch. Dis Geesfees. Dis regtig net ‘n goeie tyd.