Potchefstroom se Honde Steel die Skou by NG Kerk Mooirivier Basaar - 26 Julie

Hondekompetisie beloof om sterre van die dag te wees

Behalwe vir roosterkoek, lewerkoekies en die gewone geskarrel om die koektafel eerste te bereik, gaan daar nóg ‘n hoogtepunt wees by vanjaar se NG Kerk Mooirivier Basaar op Saterdag 26 Julie 2025 – en dié keer is dit vierpootvriende wat die kollig steel.

Ja, jy’t reg gelees – daar gaan ‘n hondekompetisie wees, en dis nie sommer net vir fancy rashonde nie. Dis vir jou brak, boef en ballerina van die agterplaas ook.

Vier kategorieë – en hope pret

Vir slegs R50 inskrywingsfooi per hond, kan jy jou troeteldier inskryf in een (of meer) van die volgende kategorieë:

• Mooiste hond

Die hondeweergawe van Miss Universe. Dis nie net oor die pels nie – dis oor daai “wow”-faktor. Strik opsit is nie verbode nie.

• Beste geaardheid

Vir die hond wat almal liefhet. Die een wat nie blaf as die posman kom nie, of dalk net vir sy goeie maniere by die kerk.

• Beste toerkies

Kan jou hond sit, rol, poot gee, of soos ‘n ninja spring? Hier’s jou kans om dit te wys. Bonuspunte as jy hom laat dans.

• Lyk soos baas

Ons weet daar’s van julle wat presies soos julle honde lyk – of andersom. Hierdie kategorie is vir die snaakse pare. Snor en hoed ingesluit.

Reëls en registrasie

Inskrywings is R50 per hond

Bring asb. ‘n leiband, ‘n plastieksak (jy weet hoekom), en ‘n goeie gesindheid

Pryse en trots

Daar sal pryse wees vir elke kategorie, maar kom ons wees reguit – dis eintlik net ‘n verskoning om trots te wees op jou beste vriend. En natuurlik om vir mekaar te lag.

Kontak Erica by 079-502-7486 as jy meer info wil hê.

So, bring jou hond, trek hom dalk aan (of jouself), en kom wys hoe lyk die trots van Potch se hondewêreld. En as jy nie ‘n hond het nie – kom kyk, lag en cheer aan. Want by dié basaar blaf ons almal saam.

The Go-To Guy - Image