Vredefort maak reg vir ’n massiewe Kruistog

As jy gedink het Vredefort is net ’n stil plekkie in die hart van die Koepel, dink weer. Die dorp is tans besig met groot planne vir "Die Kruistog 2026". Dit gaan nie net oor ’n vinnige stap in die vars lug nie, maar ’n hele ervaring wat die gemeenskap bymekaar bring.

Die hoofgebeurtenis vind plaas op Goeie Vrydag, 3 April 2026. Mense gaan saam ’n pad van 3 km stap, amper soos ’n plaaslike weergawe van die Via Dolorosa. Dit begin alles by die sportgronde om 10:30 en teen 13:00 behoort almal klaar te wees. Daar gaan musiek, sang en baie simboliek wees, so dit beloof om nogal ’n spesiale atmosfeer te hê.

Eers word daar hout gekap (of geboor)

Voor enigiemand kan stap, moet daar natuurlik kruise wees. Saterdag 21 Maart is dit "Kruis-bou Dag" by die Dinamika gemeente se kerksaal. Die doelwit is om 500 kruise aanmekaar te timmer wat later uitgedeel gaan word.

Die aksie skop om 10:00 af. Die organiseerders vra dat almal wat ’n batteryboor met ’n "square bit" het, dit asseblief moet saambring. Die houtlym en skroewe word darem voorsien, so jy hoef nie jou hele toolbox saam te sleep nie.

Gebede op papier en gratis worsbroodjies

Wat hierdie projek oulik maak, is die persoonlike touch. Mense word gevra om kaartjies saam te bring met ’n gebed, ’n mooi gedagte of ’n Bybelvers daarop. Hierdie kaartjies word dan aan die kruise vasgeheg. Die idee is dat die persoon wat later die kruis ontvang, ook daardie spesiale boodskap kry.

En omdat mens nie op ’n leë maag kan werk nie, is daar om 12:00 gratis worsbroodjies en koeldrank vir almal wat hand bygesit het. Dit is die ideale tyd om net bietjie te kuier en te social terwyl die werk gedoen word.

Hoe om betrokke te raak

As jy wil saamstap of help bou, is dit redelik eenvoudig om meer uit te vind. Hier die nodige kontakbesonderhede:

• Telefoon: 079-874-1860

• Webwerf: www.kruistog.co.za

• E-pos: info@kruistog.co.za

• Facebook: Soek vir "Die Kruistog Vredefort"

Dit is ’n regte gemeenskapspoging waar almal welkom is, of jy nou ’n boor-expert is of net daar is vir die samesyn.