Biltongfees 'n groot sukses

Met die klanke van Dozi en Jakkie Louw wat Baillie Park gevul het, was dit ‘n besonderse Vrydagaand by Amelia Nasorgsentrum se Biltongfees. 

Potchefstromers het by die massas opgedaag op Vrydag, 15 Augustus, by Amelia Nasorgsentrum. Hierdie fees het hoofsaaklik as fondsinsameling gedien nadat dié sentrum se subsidie, sonder enige vooraf waarskuwing, vroeër vanjaar met 60% deur die staat gesny is*. Die vure het al vroeg-vroeg gebrand en ‘n gesellige atmosfeer is sommer van die begin van die fees af gevestig en soos die aand

verloop het, het dit net toegeneem.

Dozi en Jakkie Louw het feesgangers deur die loop van die aand vermaak en almal het lekker saam gesing aan bekende treffers deur dié twee kunstenaars. Gespande ligte het die perseel omskep en het besoekers gelos met ‘n warm, feestlike gevoel. Daar was ook ‘n veiling gehou en dié was net so suksesvol. Met springkastele vir die kleintjies en groot vure in die middel van die grasperk waar die ouer gardes kon kuier, was dit ‘n aand vir elke lid van die familie. 

Cheers op ‘n suksesvolle Biltongfees, Amelia Nasorgsentrum! Ons maak volgende jaar weer so. 

*’n Indiepte artikel volg

_________________________________

Johané van Dyk - Potchefstroom