Boeresjiek: Waar Geloof, Familie en Pampoenpoffers mekaar Ontmoet
- Yolandi Botes
- Apr 20
- 3 min read
Soms is ’n restaurant meer as net ’n plek waar kos bedien word; dit is ’n plek waar geskiedenis geskryf word, waar gebede beantwoord word en waar elke bord kos ’n storie van generasies vertel. By Boeresjiek in Potchefstroom is dit presies die geval. Wat jare gelede as ’n klein winkeltjie genaamd Mr Salad begin het, het vandag uitgegroei tot ’n baken van sielskos en gemeenskapsdiens.
Die storie is ten nouste verweef met die lewens van Susan en Kosie, die stigters. Susan, wat vir 20 jaar ’n geliefde onderwyseres by Laerskool Baillie Park was, het haar passie vir kosmaak gevolg toe die geleentheid hom voordoen. Wat begin het met wegneemetes en slaaie, het vinnig uitgebrei toe sy ’n gaping in die mark vir egte, tuisgekookte Sondagetes raakgesien het.
Vandag staan die tweede generasie aan die stuur met Chrisna, wat aanvanklik Regte en Sielkunde geswot het en in 2013 by die familiebesigheid aangesluit het , die jaar van die groot handelsmerkverandering na Boeresjiek.
’n Gebed op die Voorstoep
Een van die mooiste staaltjies agter die skerms is hoe Chrisna haar man, Hendrie, ontmoet het. Chrisna vertel hoe sy as jong meisie gebid het dat die Here haar man letterlik tot voor haar voorstoep sou sê. Tydens ’n spysenieringswerk op die NWU-kampus het sy Dr. John van der Merwe ontmoet, wat so beïndruk was dat hy dieselfde aand sy seun, Hendrie, gebel het om te sê hy het sy vrou gevind.
Hendrie het kort daarna by Boeresjiek ingestap vir ’n koffie-afspraak, en die rest is geskiedenis. Vandag werk die paar skouer-aan-skouer nadat Hendrie sy regspraktyk in 2018 verruil het vir die uitdagings van die restaurant- en spysenieringsbedryf.
Die Geheime Bestanddeel: Emily en die "Ingewerkte" Pot
Gaste wonder dikwels wat Boeresjiek se pampoenpoffers en pampoentert so uniek maak. Die geheim lê by Emily, wat reeds 28 jaar lank deel is van die span en die poffers soos ’n goed geoliede masjien bak.
Met ’n spesifieke lepeltegniek en ’n reuse pot olie wat self ook reeds 28 jaar oud en "ingebak" is, lewer sy die perfekte ronde poffers waarvoor die dorp bekend is. Hierdie kontinuïteit en liefde vir die handwerk is wat die kos daardie spesiale tuisgemaakte smaak gee wat mens nie sommer elders vind nie.
Gesterk deur Uitdagings
Die pad was nie altyd maklik nie, en die COVID-pandemie het die besigheid hard geslaan, wat hulle genoodsaak het om een van hul twee takke te sluit. Vir Chrisna en Hendrie was dit egter nie ’n mislukking nie, maar ’n geloofsuitdaging waarbinne hulle daagliks van God se voorsiening kon getuig.
Na ’n gesondheidsskok aan die einde van verlede jaar het hulle die dapper besluit geneem om Saterdae te sluit om tyd te maak vir rus, familie en gehoorsaamheid. Hulle glo vas dat die lewe oor meer as net ’n bankbalans gaan en vertrou die Here vir elke dag se krag.
Winter-Sielskos op die Tafel
Soos die koue intrek, berei Boeresjiek voor vir hul besigste en lekkerste tyd van die jaar. Vanaf Mei-maand kan kliënte uitsien na warm vloeibare goud soos hoenderroomsop met vars gebakte potbrood, asook tradisionele gunstelinge soos beesvleisbredie, pampoentert en warm kerrie. Vir diegene met ’n soettand is daar altyd vars vetkoeke en warm melkkos gereed. Terwyl die winter buite byt, hardloop die span in die warm kombuis rond om seker te maak elke bord kos voed nie net die liggaam nie, maar ook die siel.
’n Toekoms met ’n Hoër Roeping
Vir die volgende vyf tot tien jaar is die visie vir Boeresjiek om meer as net ’n restaurant te wees. Chrisna en Hendrie sien dit as ’n bedieningsveld, veral vir jong mense en studente wat ver van die huis af is en onder groot druk verkeer.
Hulle wil ’n lig wees in ’n donker wêreld en kliënte wat met bekommernisse instap, laat voel dat hulle gewaardeer word en waarde vir hul geld kry. Dit is ’n reuse mylpaal dat Susan en Kosie reeds 46 jaar getroud is ten spyte van die harde werk, en dat Chrisna en Hendrie nou al 12 jaar van huwelik en agt jaar van suksesvolle samewerking vier.
Comments