Hoezit Samelewing bring "5 Vrouens en Ek" na Potchefstroom - 6 September

Op Saterdag, 6 September 2025, gaan dinge weer roer by die Oase van Hoop AGS in Bailliepark, Potchefstroom. Francois Boyce se produksie, 5 Vrouens en Ek, is hier met stories, musiek en ʼn bietjie van alles tussenin, net vir die dames.

Hier’s wat jy kan verwag

Francois Boyce, bekend vir sy gemaklike styl en skerpsinnige humor, gesels in hierdie 90 minute lange vertoning oor vyf vrouens wat ʼn groot invloed op sy lewe gehad het. Hierdie is nie celebs of supersterre nie, dis gewone vrouens met ongewone stories. Elke storie bring ʼn ander lewensles, maar natuurlik met daai tipiese Francois-draai wat jou laat wonder, giggel en dalk so bietjie sniff.

Hy sing ook hier en daar deur die vertoning, en volgens vorige bywoners kry hy selfs die manne en die dames op hulle voete. Dis ʼn bietjie inspirasie, ʼn bietjie drama, en ʼn hele klomp lag.

Praktiese Info

• Datum: Saterdag, 6 September 2025

• Tyd: 09:30

• Plek: Oase van Hoop AGS, 18 Wynne Straat, Bailliepark, Potchefstroom

• Kaartjies: R160 per persoon

• Besprekings: Mariette Nortje – 079 340 1925

Daar is geen onderbrekings in die vertoning nie, so bring jou waterbottel en los die kinders by die huis, dis net vir die dames.

Hoezit Samelewing – Dis nie net ‘n vertoning nie

Die produksie val onder die #hoezit samelewing reeks, ʼn platform wat met humor en eerlikheid gesels oor dinge wat saak maak. Dis nie preek nie, dis nie teater nie, dis ʼn mix van alles wat eg is.

Dis ‘n geleentheid om bietjie uit die huis te kom, te lag, te dink, en dalk ʼn traan te pink, almal in een oggend. Potchefstroom gaan nie dieselfde wees na 5 Vrouens en Ek nie.