Luna Paige en Die Reisigers by Aardklop

Die sanger-liedjieskrywer Luna Paige kuier in Potchefstroom én Stellenbosch met ’n

splinternuwe produksie, Die Reisigers , ’n introspektiewe en meesleurende musiekreis wat

sy debuut maak by Momentum Aardklop op 9 en 10 Oktober 2025.

Foto (Verskaf): Luna Paige

Net voor sy Suid-Afrika verruil vir optredes in Europa, bring Luna hierdie besonderse

produksie na haar plaaslike gehore.

In Die Reisigers verken Luna temas van beweging, stilte van gees, aanvaarding en

selfliefde. Die vertoning is geïnspireer deur haar persoonlike ervarings op reis; onder meer

op die Spaanse Camino, sowel as haar waarnemings as reisiger en kunstenaar.

Die liedjies is oorspronklik geskryf en getoonset in beide Suid-Afrika én Europa, en reflekteer op

die diep menslike verlange na betekenis, verbindings en transformasie.

“Ek gaan minder gesels en meer sing. Ek wil hê die musiek en die verbeelding van die

gehoor moet saamspeel. Hierdie vertoning gaan meer oor die innerlike veranderinge wat my

reise teweeggebring het, as oor die reise self,” sê Luna. “Die reis word ’n simbool van die

menslike groeiproses van die lewe.”

_________________________________________________________________________

Sinopsis:

In Die Reisigers sing Luna Paige oor die Groot Reis en die immer ontwykende

eindbestemming. Sy verken ruimtes waar beweging, stilte van gees, selfliefde en

aanvaarding harmonie bring.

In Die reisigers stel sy gehore bekend aan die musiek wat sy tydens haar Suid-Afrikaanse én Europese reise, onder meer die Spaanse Camino, geskryf en by die huis getoonset het. As anonieme voyeur het sy soms wel in gesprek getree en saam gewonder oor die groot verskille, maar, belangriker, oor die groot ooreenkomste wat alle reisigers op hierdie wonderbaarlike planeet aan mekaar bind.