NAMPO 2026 - Meer as net trekker-kyk by Bothaville se groot makietie

Dit is weer daardie tyd van die jaar. As jy tussen 12 en 15 Mei 2026 naby Bothaville is, gaan jy vinnig agterkom dat die lug dik is van die stof en die opgewondenheid. NAMPO Oesdag is terug by NAMPO Park, en hierdie jaar gaan dit oor baie meer as net wie die blinkste nuwe implemente het.

Die tema vir 2026 is “Veerkragtigheid deur Innovasie”. In goeie Afrikaans beteken dit basies ons boere kry swaar met die weer, hoë kostes en allerhande politieke vrae, maar hulle weier om te gaan lê. Hulle gebruik slim planne en nuwe tegnologie om kop bo water te hou en nog steeds kos op die tafel te sit.

Image: Facebook: NAMPO

Wat is nuut op die wef?

As jy dink jy het alles al gesien, dink weer. Hierdie jaar is daar 'n paar dinge wat jou oë sal laat rek:

• Wêreldrekords en nuwe wiele: Daar is gerugte van 'n poging om 'n wêreldrekord te breek met voertuie, en natuurlik is daar hope nuwe trekkers om te bekyk.

• Drones: Kyk uit vir die "spray drones" wat gewys gaan word. Dit is die toekoms van boerdery waar die werk van bo af gedoen word.

• Internasionale flair: Daar is nuwe uitstallers van so ver as China en Italië.

• Ontspanning: Daar is 'n nuwe kuier-area vir verversings en die bekende Six Gun Grill Country Hall waar jy 'n bietjie kan gaan bene rek.

Vir die dames (en almal wat van vermaak hou)

Die Santam Landbou Vroueprogram in die Rooi Rose-tent is altyd 'n wenner. Hierdie jaar is die lys name op die program nogal indrukwekkend. Mense soos Hannon, Willem Botha, Amanda Strydom en Lizz Meiring gaan daar wees om te sorg vir inspirasie en 'n goeie dosis lag.

Geen gesplete kloue hierdie jaar nie

As gevolg van die bek-en-klouseer uitbrekings, is daar 'n groot verandering in 2026. Geen diere met gesplete kloue word op die terrein toegelaat nie. Moenie bekommerd wees nie, die TAU Animal Feeds Vee-arena gaan nog steeds vol aksie wees met perde, honde en pluimvee. Die telersverenigings gaan ook op kreatiewe maniere wys wat hul diere kan doen deur middel van data en wetenskap, eerder as om net die dier self daar te hê. Daar is selfs 'n sterkman-kompetisie om dinge interessant te hou.

Hoe kom jy daar en waar bly jy?

Verkeer rondom Bothaville kan 'n nagmerrie wees, maar die reëlings lyk hierdie jaar beter.

• Vlieg: As jy met jou eie vliegtuig kom, is daar nou lugvaartbrandstof by die park beskikbaar. Century Avionics het selfs 'n "lounge" by die vliegveld.

• Ry: Daar is shuttle-dienste (soos die Mieliehop) vanaf die dorp en selfs vanaf OR Tambo.

• Slaap: Die karavaanpark by Hek 2 het 100 staanplekke met krag as jy naby die aksie wil bly.

• App: Laai die NAMPO App af. Met meer as 900 uitstallers gaan jy verdwaal sonder daardie kaart op jou foon.

Die belangrike details

Kaartjies is vanaf begin April beskikbaar op OpenTickets. Dis goedkoper om aanlyn te koop, so moenie wag tot by die hek nie. Die hekke maak 07:00 oop en waai 17:00 koebaai.

Prys:

• R140 per persoon aanlyn

• R160.00 per persoon by die hek

Onthou net, los die honde, fietse en motorfietse by die huis. Hulle word nie op die terrein toegelaat nie. As jou voete moeg word, klim net op een van die trekker-sleepwaens wat gereeld verbyry om jou by die volgende uitstalling te kry.

NAMPO 2026 gaan nie net oor besigheid nie, dit gaan oor die mense wat die land aan die gang hou. Gaan maak 'n draai by die Syngenta Boerekos Plaaskombuis vir 'n bord regte boerekos en geniet die gees van Suid-Afrikaanse landbou op sy beste.

• 

  Image Facebook: NAMPO