Potch Geesfees laat nuwe lewe op N12 blom
- Johané
- Oct 7
- 2 min read
Met vanjaar se tema het die Potch Geesfees span een doel voor oë gehad - om werklik terug te ploeg in die Potchefstroom gemeenskap. En nou, ses weke later, het die terugploeg eindelik begin.
Plan van aksie
‘n Hele paar organisasies het hande gevat met Potch Geesfees en op Vrydag, 3 Oktober, het vrywilligers, elk met ‘n swartsak in die hand, die middelmanne op die N12 begin skoonmaak. Dít was slegs stap een. Die volgende stap was om die grond voor te berei met die doel om vier tuine te skep. Die span het lekker saamgewerk en kort voor lank was die grond voorberei en het almal gehoop en bid vir ‘n goeie reënbui. Die volgende dag is die beddings verfraai en dié 'waterwise garden' is ‘n baie vriendeliker gesig wat besoekers nou in Potchefstroom verwelkom.
'n Woord van dank
Hierdie projekte kan nie sonder die hulp van vrywilligers gedoen word nie en ‘n woord van dank gaan uit aan die volgende rolspelers:
Kooperasie Kroeg en Kos
Meerkat Online Auctions
Klinkies Potchefstroom
AfriForum Buurtspan
The Go-To Guy
Jonssons Workwear
Love Potch
OMV Cruisers
Guanoboost het ook hand opgesteek, en hulle het 25L vloeibare kunsmis geskenk om die plante mooi aan te help nadat dit geplant is. ALS het ook natuurlik ingespring en het die watergeute langs die N12 skoongemaak. Hulle het ‘n ekstra span van 10 mense gehad wat Maandag (6 Oktober) papiere opgetel en verder skoongemaak het. Teen druktyd was dié span steeds besig om gras te sny op die N12 en ‘n tuinman was besig om die laaste beddings se vuilgoed uit te skoffel.
Om maatskappye en individue te sien wat nie bang is om letterlik hul hande vuil te maak met inisiatiewe soos dié, is ‘n riem onder die hart.
_____________________________________
Johané van Dyk - Potchefstroom
Foto's en video's van die projek
*Alle foto's verskaf deur Potch Geesfees
Comments