Waar gees en groen vingers saamwerk: Die Tuine-projek floreer

Die Geesfees komitee het amptelik Fase twee van die Tuine-projek afgeskop! 

Beeld: The Go-To Guy Creations

Dit is reeds ‘n maand vanaf die eerste fase van dié opwindende projek geloods is en die verskil wat die vrolike tuine langs die N12 maak, is noemenswaardig. Die afgelope vier weke het verskeie individue en maatskappye ‘n helpende hand uitgestrek om die dorp verder te verfraai, veral die nuwe waterwise tuine voor Kooperasie Kroeg en Kos.

In ‘n vorige artikel het Leanie van Ronge, een van die voorloper vrywilligers (en die een met die groen vingers), genoem dat hierdie nie net ‘n ‘one-and-done’ projek is nie, maar wel ‘n deurlopende een. Dit is juis waar die gemeenskap nou betrokke kan raak en ‘n bydra lewer. Die span benodig nog ‘klein’ vetplante vir die tuine. Dié plantjies sal as grondbedekking dien en sal ook help om die tuine voller en fraaier te maak.  “Die idee (en hoop) is om darem teen Vrydagmiddag na 16h00 al ‘n lekker hoeveelheid plante te hê wat ons kan gaan plant in die tuine wat gereed is vir kleiner plante.” 

Beeld (Verskaf): Potch Geesfees

Twee van die drie tuine kort nog groot houtstompe voordat hulle ook klaargemaak kan word. Indien jy met óf vetplante óf houtstompe kan help, gaan laai dit gerus agter Kooperasie Kroeg en Kos af. Enige verdere navrae kan aan Leanie van Ronge gerig word by: 072 314 1774. 

Kom ons help om die verwelkomende gesig van Potchefstroom ‘n vriendeliker, fraaier een te maak. 

Johané van Dyk - Potchefstroom