AP Kerk Potchefstroom se jaarlikse basaar bring boerekos en pret saam - 31 Mei

Op Saterdag, 31 Mei 2025, gaan dit weer lekker gons op Walter Sisulu Laan, want die AP Kerk Potchefstroom hou hul jaarlikse basaar. Dié gewilde gemeenskapsgeleentheid is ’n gevestigde gunsteling op die dorp se kalender en vind plaas by 371 Walter Sisulu Laan, Potchefstroom.

Wat wag op jou?

Die basaar is die ideale plek vir families, vriende, tannies wat koek bak en ooms wat boerewors rol soos pros. Dis ’n gemaklike dag uit met iets vir almal, kinders, grootmense, en selfs dié wat net kom vir die eetgoed.

Kos, kos, en nog bietjie kos

As jy opsoek is na goeie ou Suid-Afrikaanse basaar-bederf, is jy op die regte plek. Hier’s ’n paar van die eetgoed wat jou verwag:

• Hamburgers wat smaak soos vakansie in Desember.

• Boereworsrolle – daai tipe wat jou laat vergeet jy’t al ontbyt geëet.

• Poeding – waarskynlik drie soorte, minimum.

• Kerrie & rys – warm genoeg om jou neus te laat sweet, maar lekker genoeg dat jy twee keer opskep.

• Koek & tee vir die rustiger tantes en oumas.

• Pannekoek met suiker, kaneel en waarskynlik ’n druppel suurlemoensap, soos dit hoort.

Vir die kinders

“Kinder vermaak” beteken presies dit, springkastele, speletjies, en hopelik nie te veel suiker nie. Maar dis basaar, so waarskynlik tog.

Dis nie ’n musiekfees met ligte en VIP areas nie , dis ’n goeie ou kerkbasaar. Kom eet, lag, praat te veel, en koop dalk iets wat jy nie nodig het nie, maar wat jou ma gaan sê is ’n “bargain”.

Kom loer in – 31 Mei 2025. Jy weet jy wil.