Appel se vyfsnit mini-album pas uitgereik
- Charlene Bekker
- Sep 5
- 2 min read
Die veelbekroonde liedjieskrywer en sanger Appel het pas sy splinternuwe vyfsnit mini-album, “Genesis”, op alle digitale stroomdienste bekendgestel.
Twee van die snitte, “Die Boer Hier Binne My” en “Sterre”, is reeds vroeër in Augustus uitgereik en het groot aandag getrek. Nou is die volledige speellys wat uit slegs vyf snitte bestaan vir luisteraars beskikbaar.
Die titelsnit, “Genesis”, is ’n diep persoonlike lied wat Appel se geloofsreis verwoord. “Ek begin elke jaar weer by Genesis... die dag as jy jou paaie kruis met die Here, is dit nie net ’n mooi oomblik nie - dis jou eie begin. En as jy daardie dag regtig raaksien, word die geraas van die wêreld net stiller. Jy en Hy bly oor. Minder van jou, meer van Hom,” verduidelik hy.
’n Lied van Liefde en Verlange
Met “Sterre” keer Appel terug na die vroeë dae van sy liefdesverhaal met sy vrou. “Sy het in die stad gebly en ek op die plaas. Die kilometers tussen ons was lank, maar die hemel was dieselfde. Wanneer ons verlang het, het ons opgekyk na dieselfde sterre en geweet ons is tog naby,” vertel hy.
“Die Boer Hier Binne My” is geïnspireer deur gesprekke met boere en werkers regoor Suid-Afrika. Appel sê: “Ek het gereeld gehoor hoe moeilik dit geword het om iets van nuuts af op te bou, veral in landbou. In daardie konteks het die woorde van Lukas 10:2 my getref: Die oes is groot, maar die arbeiders is min.”
Die Onvoorspelbare “Alice”
Die fokussnit van die kortspeler, “Alice”, bring ’n ander energie. Geïnspireer deur 80’s-rock, beskryf Appel dié lied as die “swartskaap” van die mini-album. “Sy herinner my daaraan dat die lewe nie net gebed en swaar is nie, dis ook energie, chaos en musiek wat mag uitskiet.”
Die musiekvideo, verfilm deur Eric T Graham en Tehan Buys, is ’n nostalgiese terugflits na skooldae – met algebra, ’n te mooi proefjuffrou en stoutgat kinders wat uiteindelik hul plek in die wêreld vind.
Die mini-album word afgerond met “Lemoenkloof”, ’n lied wat Appel as rigtingwyser vir sy kind geskryf het. “Ek onthou daardie aand in die Paarl by ’n gastehuis met rooi bakstene. Ek het in die wind ’n koor gehoor wat ek nie kon ignoreer nie. Twee weke later was daar ’n lied.”
’n Projek vol Hart en Diepte
Met “Genesis” bied Appel ’n unieke balans van geloof, liefde, inspirasie en nostalgie – ’n projek wat sekerlik diep gaan resoneer met sy luisteraars.
Appel - Alice (Amptelike Musiekvideo)
Comments