Pad Langs Mark bring lewe na Potch se buitelug - 10 Oktober

Dis amper weer tyd vir die pad.langs.mark, daai lekker kuierplek net buite Potchefstroom waar almal saamkom vir ‘n dag vol kos, musiek, stalletjies en sommer net lekker mense. Die mark maak op 10 en 11 Oktober 2025 sy deure oop by Plot 91, Vyfhoek, Modderdam en dis gratis toegang vir almal.

Wat om te verwag

Dis nie een van daai “kom net kyk vinnig” markte nie, hier is iets vir almal. Van plaasvars kos, handgemaakte produkte en vars produkte. Daar’s genoeg plek vir kinders om te speel en honde is ook welkom, solank hulle net mooi deel van die geselligheid is.

Die mark loop van 09:00 tot 17:00, so daar’s genoeg tyd om deur al die stalletjies te dwaal, ‘n koffie te gryp en dalk iets vir die huis saam te vat. Dis die tipe plek waar jy halfpad deur jou pannekoek vir iemand sê, “ek gaan net gou kyk daar anderkant” en dan ‘n uur later nog besig is om te gesels.

Maklike toegang en lekker kuier

Omdat toegang gratis is, hoef niemand voor die tyd kaartjies te koop nie. Parkering is volop, en die atmosfeer is tipies Potch,rustig, vriendelik en vol lag. Of jy nou met familie kom, jou maat bring vir ‘n Saterdag uitstappie, of sommer net lus is vir ‘n dag uit, dis ‘n maklike keuse.

Dis nie ‘n grootstad fancy mark nie, en dis juis hoekom mense daarvan hou, dit’s eg, dit’s plaaslik en dis lekker. So bring jou kinders, jou hond, en jou klein kontant sak (want iemand gaan beslis iets hê wat jy “net gou” wil koop).