Pietman Geldenhuys bring die kampvuur Potch toe

As jy al ooit langs ’n kampvuur gesit het met ’n nartjieskil in die kole en iemand wat kitaar tokkel, weet jy dis waar die beste stories uitkom. Dis presies daardie vibe wat Pietman Geldenhuys na vanjaar se Momentum Aardklop bring.

Pietman was al letterlik oral gewees. Oppiestoep, Oppiewater, Oppikoppi, Oppikoffie en Oppiplaas, noem dit maar op, hy het seker al daar gesing. Maar die man self sê hy is eintlik die heel meeste tuis langs ’n vuur. Dis waar sy stories en liedjies gebore word en waar hy dit die eerste keer toets. Sy nuwe vertoning bring daardie outentieke gevoel reguit na die verhoog toe, so jy kan maar regmaak vir ’n aand wat jou amper die rokie sal laat ruik.

Beeld: Webblad - Momentum Aardklop

Een man, baie hoede

Pietman doen omtrent alles self in hierdie produksie. Hy sing nie net nie, hy het self die teks geskryf, die musiek verwerk, en hy hanteer die regie en klankbaan ook. Hy is selfs sy eie produksiebestuurder. As dinge skeefloop, kan hy niemand anders blameer nie, maar met sy track record gaan dit beslis ’n wenner wees.

Die vertoning is propvol goeie komedie en musiek, heeltemal in Afrikaans, en dis veilig vir die hele gesin. So jy kan die oumas en die kinders maar saambring. Die hele optrede is so 75 minute lank, net die regte lengte voor die bene begin krap.

Waar en wanneer om hom te sien

Die vertonings vind plaas by The Roots Kapel, geleë te MC Roodestraat 954 in Potchefstroom. Daar is ’n paar opsies as jy wonder watter dag jou die beste sal pas:

• 29 September om 19:00

• 30 September om 16:30

• 1 Oktober om 16:30

• 3 Oktober om 16:30

Hierdie show is perfek vir enigiemand wat hou van goeie ou Suid-Afrikaanse storievertelling, akoestiese musiek en daardie lekker, ontspanne buitelug-atmosfeer sonder dat die muskiete jou eintlik byt.

Kaartjies en belangrike info

Moenie wag tot die laaste minuut nie, want die prys verander na gelang van hoe vinnig jy bespreek. As jy aanlyn koop, spaar jy ’n paar rand wat jy eerder vir ’n koue enetjie kan gebruik.

• Hartsvriende: R160.00

• Aanlyn: R180.00

• By die deur: R200.00

Jy kan jou kaartjies sommer dadelik aanlyn koop by Seatme.

Seatme