Wanneer 'n parkbankie 'n slagveld word - Momentum Aardklop debuteer Dieretuin

Amanda Bekker
2 days ago
2 min read

Verbeel jou jy sit rustig op 'n bankie in die park. Jy geniet die stilte en lees jou boek. Skielik daag daar 'n vreemdeling op wat sommer uit die bloute aankondig: "Ek was by die dieretuin." Dit is presies hoe die tragikomedie Dieretuin begin, 'n splinternuwe produksie wat sy debuut maak by Momentum Aardklop.

Hierdie eenvoudige woorde ontwrig Peter se rustige Sondag heeltemal. Die vreemdeling, Jerry, begin 'n gesprek wat baie vinnig verander van ongemaklike chit-chat na 'n taamlike intense konfrontasie. Die storie gaan oor eensaamheid, menslike kontak en daardie baie dun lyn tussen beskawing en ons innerlike dierlikheid. Soos Jerry se stories donkerder en meer persoonlik raak, moet Peter sy eie lewe en binneste begin bevraagteken. Voor die gehoor dit besef, verander 'n gewone parkbankie in 'n simboliese slagveld. Dit is 'n rou en aangrypende ondersoek na isolasie en die desperate behoefte om werklik met 'n ander mens 'n band te vorm.

Bekende gesigte op die verhoog

Die produksie is 'n Afrikaanse verwerking van Edward Albee se bekende teks, hanteer deur Kaz McFadden wat ook self op die verhoog is. Saam met hom is die bekende Hannes Brümmer te sien. Albei akteurs bring hope ervaring na die verhoog, so verwag skerp toneelspel wat jou gelyktydig laat dink en dalk so 'n bietjie ongemaklik laat giggel.

Die regie en beligtingsontwerp word behartig deur Lara Lourens, terwyl 'n hele span kreatiewe mense insluitend Melandi Swiegelaar en Luan Maartens gehelp het met die stelontwerp. Die kostuums is deur Ethan Cooke behartig, met verhoogbestuur deur Chanelle Swart en Anina Michelle Naudé. Die vervaardiger agter die skerms is The Third Law, met Ilke König as produksiebestuurder.

Die stuk is perfek vir mense wat hou van goeie drama met 'n tikkie swart komedie. Dit duur sowat 60 minute, wat beteken dit is vinnig en kragtig, maar weens die dieper temas is daar 'n ouderdomsbeperking van geen onder 13's nie.

Kaartjies en belangrike reëlings

Die vertonings vind plaas by POK (C6) op die Potchefstroom NWU-kampus. Daar is drie verskillende kanse om die stuk te sien vroeg in Oktober.

Kaartjiepryse is uitgewerk om vir almal 'n opsie te gee, veral as jy vroegtydig bespreek. Hartsvriende kry die beste prys teen R170.00, terwyl gewone aanlyn kaartjies jou R190.00 sal kos. As jy besluit om eers op die nippertjie by die deur te koop, is die prys R210.00.

Alles wat jy moet weet: